O legado literario e xornalístico de Álvaro Cunqueiro revive baixo as novas miradas no congreso internacional “Mil e un Cunqueiros”, que este xoves se traslada á Coruña. A conferencia inaugural correu a cargo do ex ministro de Cultura, César Antonio Molina, quen realizou unha reflexión sobre a poética cunqueiriana e sobre o substrato poético que caracteriza o seu facer literario e xornalístico. O autor da conferencia inaugural percorreu as manifestacións da lírica de quen definiu como “un grande escéptico ao que traizoaba a súa vehemencia por todo o que relataba, alguén que sempre acreditou no encantamento polas palabras”.Os relatorios da primeira xornada abrangueron a dimensión de Cunqueiro nos medios de comunicación, particularmente na súa columa “El envés” na última páxina do xornal “Faro de Vigo” (Monserrat Mera) e na revista “Destino” (comunicacións de Juan Miguel Ribera, María Victoria Navas e Carmen Mejía). Houbo achegas á biografía cunqueiriana (Xosé Luís Franco Grande, Xosé Manuel Dasilva e Rexina Vega). Sobre as artes plásticas e escénicas e o seu diálogo con Cunqueiro falaron Afonso Becerra e Inma López Silva. Xosé Luís Janeiro Espiñeira e Beatriz Vázquez Rosales xunto con Luís Rodríguez Ennes e Luísa Blanco Rodríguez aventuráronse polas fórmulas e as ideas xurídicas de Cunqueiro.
A primeira xornada do congreso concluiu coa conferencia “Alvaro Cunqueiro, unha mirada holística”, que pronunciou o profesor Anxo Tarrío, da Universidade de Santiago de Compostela, no Salón Nobre de Fonseca.