“Rías Baixas. Territorio Gastronómico” vén de ser galardoado co prestixioso premio Gourmand, Best in The World, ao mellor libro de gastronomía local do mundo. A obra, editada pola Deputación de Pontevedra, xa fora premiada na fase anterior do concurso, que o recoñecía como o mellor de España, e agora acada o galardón máximo, ao ser valorado como o mellor a nivel mundial.Este galardón supón –ao ver do ente provincial- un novo recoñecemento para as Rías Baixas e contribuirá, sen dúbida, a difundir a provincia de Pontevedra como destino turístico.
Coordinada por Uqui Permui e Marta Lucio e escrita por Manuel Gago e Jorge Guitián, con fotos de Francesc Guillamet, a publicación achéganos ao mellor da cociña pontevedresa por medio de entrevistas e receitas dos cociñeiros do Grupo Nove. Alberto González (Silabario), Rafa Centeno (Maruja Limón), Iñaki Bretal e Roberto Figueira (Eirado da Leña), Pablo Romero (Allo e Aceite), Pepe Solla (Casa Solla), Xosé T. Cannas (Pepe Vieira Camiño da Serpe), Yayo Daporta (Yayo Daporta), Antonio Botana (Pandemonium) e Javier Olleros (Culler de Pau) falan das súas experiencias, da súa forma de ver a cociña e dos produtos gastronómicos galegos. (Foto: Capítulo 0)