O presidente da
Deputación de Ourense, Manuel Baltar, reuniuse co delegado en Galicia do
Colexio Nacional de Xeólogos, Jesús Gómez Besteiro, e co delegado adxunto, Pedro
Araújo, para establecer liñas de colaboración entre a delegación dos xeólogos galegos
e a Deputación de Ourense no marco do Plan Termal provincial que está a
elaborar o goberno provincial.
Dende a Deputación de Ourense consideran de vital importancia contar coas achegas técnicas que poidan aportar os xeólogos de Galicia.
Precisamente a xuntanza tiña como finalidade inaugurar unha etapa de
colaboración co Colexio de Xeólogos tendo ao termalismo como primeira liña de
traballo.
O termalismo é un dos potenciais máis característicos da provincia de
Ourense, razón pola que Baltar Blanco convidou aos xeólogos a asistir á presentación do Plan Termal provincial,
que terá lugar proximamente, documento que a Deputación de Ourense está a
elaborar conxuntamente coa Xunta de Galicia, para que a partires desa
presentación o Colexio de Xeólogos teña un papel destacado no desenvolvemento e
execución do dito Plan Termal.