A Xunta de
Galicia, a través de Turismo de Galicia, promoverá o turismo ornitolóxico da Comunidade
galega entre os días 28 de febreiro e 2 de marzo na Feira Internacional do Turismo Ornitolóxico, FIO, que se celebrará
en Monfragüe, Estremadura, que está considerado o certame turístico máis
importante de España nesta modalidade.
Nesta
feira, que se desenvolverá no Parque Nacional de Monfragüe, Turismo de Galicia
instalará un recinto de nove metros cadrados co obxecto de poñer en valor o
patrimonio natural de Galicia e a súa riqueza ornitolóxica.
Neste eido,
Turismo de Galicia ten desenvolvido a ornitoloxía como produto turístico galego
e así, editou un folleto cos dez lugares máis importantes da Comunidade Autónoma
para o albiscamento de aves, tanto na costa como no interior: a ría de
Ortigueira e Cariño, Estaca de Bares e a ría do Barqueiro, a ZEPA da Limia, Oímbra,
Monterrei e Verín; a serra da Enciña da Lastra, a Costa da Morte, Montes de
Cervantes (Os Ancares), os Humidais da Terra Chá e a Ribeira Sacra.
Por outra
parte, Turismo de Galicia estará presente tamén en Madrid, dende hoxe ata o día
1 de marzo, na xuntanza de traballo relacionada co Turismo de reunións Meetings Space Spring, organizada para a
promoción desta modalidade turística nas distintas comunidades autónomas
españolas.
Durante
estes tres días, Turismo de Galicia manterá xuntanzas de traballo con provedores
e destinos turísticos europeos ao obxecto de promover as posibilidades que
ofrece a Comunidade galega para a organización de congresos, xuntanzas de
empresa ou viaxes de incentivo.