A conselleira do Medio Rural e do Mar, Rosa
Quintana, destacou que a conxunción da oferta turística da nosa Comunidade coa
gastronomía galega é un binomio difícil de superar, que se converte nun motor
importante da economía de Galicia. Así o sinalou durante a presentación da IV
edición de “Come o Mar”, unha iniciativa conxunta de todos os Grupos de Acción
Costeira, unidos baixo a marca de Turismo Mariñeiro de Mar Galaica.
Neste senso, a Consellería potencia a
dinamización e diversificación das estruturas socioeconómicas das áreas ribeirás
mediante achegas aos GACs. Así, o Diario Oficial de Galicia acaba de publicar o
crédito destinado por Medio Rural e Mar para axudas a proxectos dos GACs na
convocatoria de 2014, que ascende a un total de 10,3 millóns de euros.
A través do programa “Come o mar” numerosos
establecementos e entidades ofertarán durante as fins de semana do vindeiro mes
de xuño menús degustación, rutas de tapas, actividades mariñeiras e paquetes
turísticos. A iniciativa tamén inclúe a divulgación da historia e tradición da
cultura mariñeira a través de diferentes propostas das vilas costeiras.