O Consello da Xunta aprobou na súa reunión de hoxe o decreto
que establece a nova estrutura orgánica da Consellería do Medio Rural e do Mar.
A través del a Xunta reestrutura este departamento para, entre outros
obxectivos, optimizar a xestión en todo o relacionado coa cadea alimentaria.
Coa nova estrutura a Subdirección Xeral de Industrias e Calidade
Agroalimentaria, que ata agora pertence á Secretaría Xeral de Medio Rural e
Montes, pasa a formar parte da Dirección Xeral de Produción Agropecuaria. Deste
xeito, estará baixo a mesma dirección xeral todo o relativo á cadea
alimentaria, que vai dende a produción agrícola e gandeira ata a transformación
das materias primas agrarias e a súa comercialización.
Ademais, a través deste decreto, créase o Servizo do Sector
Lácteo, que se constitúe no Fondo Galego de Garantía Agraria (FOGGA), a partir
da fusión dun servizo existente na Dirección Xeral de Produción Agropecuaria
(Servizo de Coordinación e Seguimento) e do servizo de intervención de mercados
do FOGGA. Ao Servizo do Sector Lácteo correspóndelle, entre outros aspectos, a
análise e seguimento das problemáticas do sector lácteo e dos prezos do leite e
a implementación da xestión técnico-económica nas explotacións leiteiras para
análise dos custos de produción. Ademais, as competencias do observatorio
lácteo pasan a este servizo.