A campaña Galicia Calidade en ruta achégase mañá a Cambados
(praza do Concello, a partir das 12 horas), por medio dun camión adaptado onde
o chef cambadés Yayo Daporta protagonizará unha exhibición de cociña
–showcooking- con produtos do país. Pola tarde, a partir das 18 horas, serán os
sumilleres José Luis Aragunde e Eulogio Pomares, terceiros nun concurso mundial
de catadores celebrado na rexión de Champagne (Francia), os que dirixan unha
cata comentada de viños.
Antes, ás 11.30 horas, no mesmo trailer de Galicia Calidade,
o alcalde, Luis Aragunde, xunto con representantes das adegas e depuradoras
participantes, presentarán aos medios informativos a terceira edición da cata e
maridaxe dos viños escumosos da DO Rías Baixas
coas ostras de Cambados. Este evento vaise celebrar o vindeiro domingo
14, a partir das 12 horas, no salón de congresos Peña.
A campaña Galicia Calidade en ruta aposta por seguir
accedendo aos mercados máis competitivos e esixentes, xa que a marca representa
o compromiso das empresas galegas co esforzo por ofrecer os mellores produtos e
servizos, e o uso das mellores prácticas para a produción, elaboración e
comercialización dos produtos.
A campaña promocional está enfocada aos profesionais do
sector da gastronomía (hostalería, restauración e retail), consumidores e
prescritores, co obxectivo de poñer en valor os produtos do sector alimentario
certificados por Galicia Calidade. Galicia Calidade en ruta consiste nun
roadshow no interior dun camión adaptado que, ademais de Cambados, visita as principais
cidades e vilas galegas.