O Diario Oficial de Galicia (DOG) publica
hoxe a Orde da Consellería do Medio Rural e do Mar pola que se establecen as
bases reguladoras e a convocatoria para 2015 das axudas a agrupacións de
produtores para a realización de actividades de información e promoción de
produtos agroalimentarios galegos con calidade diferenciada, no marco do
Programa de Desenvolvemento Rural para Galicia (PDR) 2007-2013. Estas axudas
están cofinanciadas polo Fondo Europeo Agrícola de Desenvolvemento Rural
(FEADER), polo MAGRAMA e pola Xunta de Galicia, e contan cun orzamento de 1.760.000
euros.
A finalidade
destas achegas é financiar accións de información e promoción dirixidas a animar
ao consumidor a adquirir produtos incluídos no marco de programas de calidade
diferenciada dos alimentos. A novidade principal é que, ao tratarse da última
convocatoria que se fará con cargo ao actual PDR, non se contempla a
posibilidade de accións plurianuais, de xeito que se poderán financiar accións
que se desenvolvan no ano 2015, coa data límite para as actuacións, do 4 de
setembro.