Co fin de achegar aos profesionais da gastronomía e ao
público en xeral as cualidades excepcionais do Pemento do Couto e o Tomate
Negro de Santiago, dúas hortalizas que se cultivan no agro naronés (A Coruña),
o Concello de Narón en colaboración coa D.O. Ribeiro, a Cooperativa do Campo
Galego O Val- Narón e Mercaval celebran este xoves, 23 de xullo ás 13.15 horas
unha presentación gastronómica no emblemático restaurante lucense “Paprica”,
propiedade do cociñeiro Álvaro Villasante, tamén integrante do Grupo Nove.
No acto, no que estarán presentes o concelleiro de Promoción
Económica de Narón, Pablo Villamar, e o presidente da Cooperativa do Campo
Galego O Val-Narón, entidade que aglutina aos produtores que cultivan estas
hortalizas, ademais de outras autoridades, o chef Álvaro Villasante amosará o
uso do Pemento do Couto e o Tomate Negro de Santiago como ingredientes
exclusivos da cociña tradicional e de vangarda cunha demostración culinaria e
posterior degustación na que preparará pratos elaborados con estes dous
produtos, coincidindo coas xornadas “Horta de Narón” que se celebrarán no mes
de agosto neste concello da comarca de
Ferrolterra.
O Pemento do Couto e o Tomate Negro de Santiago son dous
produtos locais de gran calidade que actualmente cultiva e comercializa a
Cooperativa do Val, na súa aposta pola recuperación e posta en valor de
variedades autóctonas.
A Cooperativa produce desde hai anos o Pemento do Couto,
unha hortaliza xa consolidada na mercado, que conta coa Indicación Xeográfica
Protexida e que se caracteriza polo seu excelente sabor e propiedades, entre
elas, a súa docura e que non pica.