Unha nova edición do congreso de Compostela
Monumental, que se desenvolve baixo o título ‘Turismo, Comercio, Europa, Innovación:
30 anos fortalecendo as áreas comerciais urbanas’, arrancou esta mañán no Hostal dos Reis Católicos. Ao longo dos seus
relatorios abordaranse aspectos como o turismo de compras, a proxección mundial
do Camiño de Santiago e a súa repercusión nos centros históricos comerciais, ou
as novas tecnoloxías e a innovación aplicadas a estes establecementos.
Na inauguración deste encontro, a directora de Turismo de Galicia, Nava Castro, destacou que “as compras estanse consolidando
como un segmento clave dentro da industria do turismo e son un elemento
destacable na contribución da consolidación do destino, no crecemento
económico, na xeración de ingresos e na creación de postos de traballo”.
Segundo engadiu, aos beneficios económicos hai
que engadir os sociais, xa que o comercio serve como unha plataforma de
rexeneración urbana mediante o incremento de valor de zonas que ata o de agora
eran menos visitadas por turistas.
As compras son un elemento imprescindible na
experiencia do viaxeiro contemporáneo e en moitos casos se converte na
principal motivación ou no factor determinante para a elección dun destino.