A Asociación elaborou unha serie de vídeos en castelán, galego e inglés que está a difundir a través das súas redes sociais (facebook e twitter) baixo o lema Coidar o Camiño, responsabilidade de todos. Neles abórdase a relevancia de reciclar os envases de auga mineral, “depositándoos no colector amarelo, asegurándose antes de que a botella está completamente baleira, comprimida e co tapón”. Ademais, peregrinos de diferentes procedencias relatan a súa experiencia no Camiño e inciden na importancia de hidratarse e de coidar o medio.
O xerente da Asociación, Benigno Amor, salienta que “a auga mineral natural procede de acuíferos subterráneos protexidos de calquera contaminación” e resáltanse as propiedades dos envases. Asegúrase que “son seguros porque protexen a pureza orixinal da auga e manteñen inalterable a súa composición mineral; son resistentes, cunha composición sólida, practicamente irrompibles; cento por cento reciclables; o seu etiquetado permite coñecer a súa orixe, composición e data de consumo preferente; e son lixeiros, posto que o uso eficiente dos materiais facilita o transporte e reduce a pegada de carbono”.
Respecto ao feito de que as botellas de auga mineral son 100% reciclables, desde a Asociación resáltase que “grazas á reciclaxe, poden converterse en novas botellas ou noutros produtos como camisetas, mochilas, forros polares...”.
A través destes vídeos amósase a importancia de aprender a hidratarse cando facemos exercicio e, en particular, o Camiño. Nesta liña, saliéntase que a auga transporta e favorece a absorción de nutrientes para ter un rendemento óptimo; axuda a manter a concentración e o rendemento físico; transporta hemoglobina, que contén osíxeno fundamental para o bo funcionamento dos músculos; regula a temperatura corporal, absorbendo a calor e liberándoa por medio da transpiración; contribúe a regular a presión arterial; axuda a lubricar as articulacións, ligamentos, cartilaxe…; e favorece a eliminación de toxinas e outros restos do organismo.