Máis de 75.000 persoas desfrutaron nestes últimos anos desde o 2016 dos itinerarios do programa provincial “En Ruta coa Depo”, que a Deputación volve poñer en marcha neste 2022 trala pandemia. Deste xeito, o Goberno vén de adxudicar por 445.900 euros a realización desta iniciativa que, como destacou a presidenta provincial Carmela Silva, ofrece á veciñanza da provincia a posibilidade de pasar un día de convivencia en lugares emblemáticos do territorio, a elixir entre un total de 32 rutas, co acompañamento dunha persoa guía de turismo e incluíndo xantar e transporte.
En total, este ano ofertaranse 20.000 prazas e as 32 rutas están divididas en itinerarios temáticos, culturais, marítimos, rutas adaptadas para persoas con mobilidade reducida, rutas dinámicas e interxeracionais.
“Búscase –sinalou a presidenta- crear espazos de unión, así como o acceso igualitario aos recursos turísticos e favorecer o envellecemento activo”. Do total de prazas, resérvanse 400 gratuítas para persoas con dificultades económicas ou risco de exclusión social que non podan facer fronte á parte non subvencionada do programa.
