Os produtos “que saben” da provincia da Coruña consolidan a súa presenza nos circuítos profesionais de Madrid Fusión

 

Ao igual que ocorrera na pasada edición do Fórum Gastronómic, os produtores e produtoras que participaron en Madrid Fusión no posto da Deputación da Coruña salientaron os bos resultados en canto a contactos comerciais. Neste congreso especializado en alta gastronomía, os principais contactos que realizaron as seis marcas presentes no posto  da institución provincial centráronse en ampliar as liñas de distribución a nivel estatal.

"A estratexia turística que estamos desenvolvendo baixo a campaña 'A provincia que sabe' debe estar presente en foros deste tipo, que funcionan como circuítos moi profesionalizados e onde constatamos que os nosos produtos culinarios son apreciados e demandados pola súa calidade contrastada", asegurou o vicepresidente da Deputación. "Tanto o sector como a Deputación estamos facendo historia poñendo a gastronomía da Coruña ao mesmo nivel que os grandes territorios gastronómicos do resto do Estado", engadiu Xosé Regueira.