A alcaldesa de Lugo, Lara Méndez, vén de poñer a disposición das e dos lucenses a primeira rúa de Galicia convertida en museo da arte urbana ao aire libre: a rúa do Esquecemento, que será un reclamo para veciños e turistas.
Acompañada de veciños e veciñas da Milagrosa e de grafiteiros lucenses, a rexedora puxo en valor a transformación que sufriu a vía, agora peonil, “colorida e, sobre todo, un novo espazo de socialización para a cidadanía”. Neste senso, Méndez expresou a súa satisfacción “polo fermoso resultado acadado”, convertendoa, a través da iniciativa municipal e do talento lucense, “nun emblema e referente da arte urbana e do talento artístico da cidade”.