A Coruña ensalzarará o bonito da súa lonxa durante todo o verán

O sector gastronómico coruñés estrea este verán as I Xornadas do Bonito da Lonxa da Coruña, que se celebrarán en restaurantes da cidade entre o 15 de xullo e o 15 de agosto. O Concello da Coruña, a través do Consorcio de Turismo e Congresos da cidade, colabora na posta en marcha desta iniciativa, organizada por Coruña Cociña, un colectivo de chefs da cidade. Un dos obxectivos destas xornadas é poñer en valor un produto de gran valor gastronómico, como é o bonito que sae da Lonxa da Coruña.

As xornadas presentáronse esta mañá na lonxa nunha rolda de prensa na que participaron Moisés Jorge Naranjo, xerente do Consorcio de Turismo e Congresos da Coruña; Javier Freijeiro, presidente de Coruña Cociña; Juan Carlos Corrás, presidente da Lonxa da Coruña; Pedro Pastur, responsable de Trade Márketing de Estrela Galicia e numerosos cociñeiros e cociñeiras que participan nesta iniciativa.

Son 16 os establecementos que forman parte de Coruña Cociña e que poñen en marcha estas primeiras xornadas gastronómicas centradas no bonito: A Taberna de Faragulla, Charlatán, Culuca, Greca, Intenso, Millo, Nado, Pablo Galego Restaurante, Peculiar, Pracer, Pulpeira de Melide, Salitre, Taberna dá Tabacalera, Terreo, Ultramarinos Galera e Vinoteca Balbordo. Nesta iniciativa colaboran, ademais do Concello da Coruña a través do Consorcio de Turismo e Congresos da cidade, a Lonxa da Coruña, achegando aos restaurantes o produto necesario, e Estrela Galicia, apoiando na promoción e na Cultura da Cervexa.

Os comensais poderán degustar bonito da Lonxa da Coruña nos restaurantes citados en formato tapa, ración dentro da carta ou menú degustación xunto cunha proposta de maridaxe realizada por Estrela Galicia con 1906.