O Consello da Xunta coñeceu hoxe da nova liña de apoios que o Goberno galego vai poñer en marcha na procura de facilitar o acceso ao financiamento ao sector do viño galego de cara á campaña deste ano. O programa, que suma máis de 2M€, permitirá ás adegas acollidas ás denominacións de orixe (DO) e indicacións xeográficas protexidas (IXP) paliar o encarecemento do financiamento da adquisición da colleita subvencionando xuros e gastos financeiros. Neste sentido, cómpre salientar que, a causa da pandemia da Covid-19, moitas adegas tiveron que recorrer a instrumentos financeiros que lles permitiron aprazar os pagamentos das colleitas deses anos e que agora deben ser amortizados. Este feito, unido á suba xeneralizada de tipos de xuros, dificulta o financiamento da campaña da uva deste ano, afectando a competitividade das adegas e mesmo os prazos da colleita.