O presidente do Consello Regulador, e recén nomeado presidente da Ruta do Viño de Valdeorras, Marcos Prada Ginzo, mantivo un encontro co director de Turismo de Galicia, Xosé Merelles, na que fixeron un repaso da aposta da Xunta de Galicia polo enoturismo na comarca e tamén polos distintos programas de promoción nos que o Goberno galego vén colaborando desde hai anos.
Na reunión, Prada Ginzo propúxolle ao titular de Turismo “actividades para os dous entes” que él mesmo preside e que resultaron “moi ben acollidas, de feito temos o seu compromiso de facer o posible para poñelas en marcha”.
Trátase de productos como a ‘Primavera de Portas Abertas’, a BTT Ruta do Viño e outros eventos relacionados con este atractivo turístico como a celebración da Bacofesta e as Feiras do Viño e das Covas de Vilamartín de Valdeorras e tamén de Seadur (Larouco).
Pola súa banda, Mereles salientou o millón e medio de euros destinados ao plan de sostibilidade turística en destino que está en marcha na comarca e que contempla actuacións específicas en materia de dixitalización e impulso desta ruta do viño. Ademais, Merelles lembrou o feito de que distintas adegas incluídas nesta entidade recibiron axudas da Xunta na convocatoria de proxectos turísticos de enogastonomía por importe de case 400.000 euros.